Buhay Pasko…

Juan de marco

                        Sabi nila sa tuwing sasapit ang pasko, ito raw ang pinakamasayang bahagi ng ating mga buhay. Pero sa akin puede kong masasabi na hindi naging masaya ang lahat ng naging pasko. Halos 5 taon na akong di nakaranas ng masayang pasko sa atin, malungkot man na isipin pero andito tayo sa ibang bansa nakikibaka para sa ating mga pamilya. Mahirap magdiwang ng ganitong okasyon na malayo sa ating mga mahal sa buhay. Nag iiisa, nakikinig sa mga awiting pampasko pero kulang pa rin. Ika nga sabi nila “there’s no place like home” sa tuwing naalala ko ang mga bagay na ginagawa sa tuwing kaspakuhan, pag sasama sama ng bawat pamilya, mga nag gagandahang ilaw sa daan, masasarap na pagkain sa hapag kainan, pag sisimbang gabi kasama ang pamilya at marami pang iba. Ito ang mga bagay na wala dito sa Kuwait. Meron man pero hindi kapares ng ating nararanasan sa Pilipinas. Kahit wala ng matira sa ating kinita sa buwan ng disyembre basta’t mapaligaya lang natin ang ating mga mahal sa buhay sa Pilipinas. Kung isipin natin kung bakit tayo nandito marahil ito ay para rin sa kanila at sa ating mga sarili na sa banding huli ay may mahuhugot tayo para sa ating ikabubuhay. Pasalamat tayo at pinagpalang makapag abroad samantalang andami sa atin ang hindi sinuswerte na naka pangibang bansa kagaya natin. Kaya lubos lubosin na natin habang tayo ay nandito at kumikita para sa ating mga darating na bukas. Isipin na lang natin na ang mga bagay na itatanim natin ngayun at bukas ay pang habang buhay na nating aanihin. 

                        Pero ano nga ba ang buod ng kapaskuhan? Ito ang araw ng pagsilang  ng ating poong maykapal na siyang tanging tagapagligtas sa ating mga kasalanan. Marami sa atin ang nakakalimutan ang tunay na diwa ng araw na ito, wala sa mamahaling damit o regalo, masasarap na pagkain ang tunay na pasko kundi ito ay nasa ating mga puso na nagmamahal at umuunawa. Sa panahon natin ngayon may mga bagay na mas dapat mahalaga sa ating pananaw marahil na rin sa pinagdadaanan ng ating pang daigdigang ekonomiya. Isantabi na lang natin muna ang ating mga personal na sama ng loob at galit upang ma-ipagdiwang natin ang kapaskuhan ng matiwasay sa ating mga puso.

                        Lugod ko pong binabati ang ating mga kababayan dito sa Kuwait ng isang maligayang pasko at manigong bagong taon po. Sana sa pagpasok ng 2009 ay sama sama parin tayo na harapin ang mga hamon sa buhay at ang patuloy na pagsuporta ninyo sa THE FILIPINO MAGAZINE. Mabuhay ka KABAYAN!!!